અછાંદસ...

દેશની આઝાદીના જન્મ-દિવસે,
બધા નેતાઓ એ કેક કાપી,
અને ભાગે પડતા ટુકડા
વહેંચી લીધા...

તમારા ભાગમાં શું આવ્યું?
સુકો રોટલો???
કેટલાકને તો એ પણ નહીં...

યોગેન્દુ જોષી "યોગ" : ૧૫/૦૮/૨૦૧૨

તાન્કા...

સર્વે ભારતીયોને આઝાદ દિવસની શુભકામનાઓ...

એક દિવસ વહેલી એટલા માટે, કે કાલે દેશ માટે જે કરવાનું વિચારો, તે આજીવન
ચાલુ રાખો...

નહીંતર આ તાન્કા મુજબ બધું ભઈ "રાબેતા મુજબ"...

દેશ જુવાળ,
એક દિ પુરતોજ,
બાકીતો ભઈ,
વરસોથી એનું એ,
છે રાબેતા મુજબ...

યોગેન્દુ જોષી "યોગ" : ૧૪/૦૮/૨૦૧૨

કૃષ્ણ જન્મ (અછાંદસ)

કૃષ્ણને તો જનમવું છે,
પાપનો અંત લાવવા,
પણ,
દેવકી, વાસુદેવ જેવા
માં - બાપ મળતા નથી...

અને કદાચ,
મળી જાય તો...

યશોદા અને નંદબાબા મળવા,
નામુમકીન છે...

યોગેન્દુ જોષી "યોગ" : ૧૦/૦૮/૨૦૧૨

ક્ષણિકા...

રોજ સવારે,
તેલ ભરેલા અશ્વ લઈને,
ભરણ પોષણ માટે દોડતો માણસ,
શ્વાસમાં મોંઘવારીનો ધુમાડો ભરી,
સ્વપ્નાઓના ઉચ્છવાસ બહાર કાઢી,
આખરે ઘરે પાછો ફરે છે...

યોગેન્દુ જોષી "યોગ" : ૦૩/૦૮/૨૦૧૨

ક્ષણિકા...

માફી અને લાગણીના સોય-દોરાથી,
સંબંધ બાંધવા તો ગયો...
પણ હાય રે કિસ્મત,
એમની ચામડી મગરની નીકળી...

યોગેન્દુ જોષી "યોગ" ૨૮/૦૭/૨૦૧૨

તાન્કા...

એકાદ ધક્કો,
નાની સી અડફેટ,
શબ્દો ખાયતો,
ગઝલ છંદ તોડી,
તાન્કામાં થાય સેટ...

યોગેન્દુ જોષી "યોગ" : ૨૪/૦૭/૨૦૧૨

ક્ષણિકા...

દીકરી,
એતો છે,
સૂર્ય કિરણ જેવી...
જ્યાં પણ જાય,
પિતાનું નામ રોશન કરે...

યોગેન્દુ જોષી "યોગ" : ૨૪/૦૭/૨૦૧૨

તાન્કા...

એકાંત સાથે,
સંવાદ કર્યા પછી,
ખબર પડી.
એય શોધી રહ્યો છે,
બે વાતો કરનાર...

યોગેન્દુ જોષી "યોગ" : ૧૫/૦૭ ૨૦૧૨

હાઈકુ...

મેં ન્હોતું કીધું,
ગમે ત્યાં દોડ, છેલ્લે;
ઘર આવશે!!!

યોગેન્દુ જોષી "યોગ" : ૧૫/૦૭/૨૦૧૨

ક્ષણિકા...

એક છુંદણું,
જેમ પોતાના અસ્તિત્વ માટે,
મૃતપ્રાય થયેલ ચામડી પર,
વળગી રહેવા સંઘર્ષ કરે છે...

બસ હા, એવીજ રીતે;
હું પણ આપણા સંબંધને
પકડીને ઉભો છું.

યોગેન્દુ જોષી "યોગ" : ૧૧/૦૭/૨૦૧૨

તાન્કા...

પાણી જ્યાં આવ્યું,
કાચઘર બહાર,
ત્યાં અમે જાણ્યું;
કે માછલી રડે છે,
નદી યાદ કરીને...

યોગેન્દુ જોષી "યોગ" : ૧૦/૦૭/૨૦૧૨

હાઈકુ...

ડૂમો ભરીને,
બેઠેલા આ વાદળો;
રડેતો સારું.

યોગેન્દુ જોષી "યોગ" : ૦૩/૦૭/૨૦૧૨

હાઈકુ...

મુસાફર છું,
મનેતો માર્ગ સાથે,
સગપણ છે.

યોગેન્દુ જોષી "યોગ" : ૦૧/૦૭/૨૦૧૨

ક્ષણિકા...

બાળ મજૂરે,
ત્રાંસી આંખે,
રમકડું;
રમી લીધું.

યોગેન્દુ જોષી "યોગ" : ૦૧/૦૭/2012

હાઈકુ...

ચિત્ર સ્પષ્ટ છે,
પોતાની દુનિયામાં,
સહુ વ્યસ્ત છે.

યોગેન્દુ જોષી "યોગ" : ૩૦/૦૬/૨૦૧૨

હાઈકુ...

એક ઝાટકે,
તૂટેલો આ સંબંધ;
વર્ષો ટક્યો'તો!!!

યોગેન્દુ જોષી "યોગ" : ૨૯/૦૬/૨૦૧૨

પ્રેમમાં, શું, સવાર થાય છે??? (ગઝલ)

રોજ શબ્દો સવાર થાય છે;
ખુદ કલમ ધારદાર થાય છે.

ભૂત., વળગણ નથી ચડ્યું, છતાં;
કો'ક ત્યાંથી પસાર થાય છે.

ભૂલથી જે નજર ગમી હતી;
એ હવે આરપાર થાય છે.

ભીંતને કાન આવશે નવા;
એને પણ, હા, પગાર થાય છે.

યોગ, દિલને સવાલ પૂછજે;
પ્રેમમાં, શું, સવાર થાય છે?

યોગેન્દુ જોષી "યોગ" : ૨૭/૦૬/૨૦૧૨

હાઈકુ...

દર્દનું ડૂસ્કું,
અંદર રહી ગયું,
ને જીવ ગયો...

યોગેન્દુ જોષી " યોગ" :૨૮/૦૬/૨૦૧૨

અછાંદસ...

તને જોવા
હું થોડો નીચે આવ્યો,
કિન્તુ લોકો એ;
મને તૂટેલ તારો માની,
ઈચ્છા માંગી લીધી.

યોગેન્દુ જોષી "યોગ" : ૨૭/૦૬/૨૦૧૨

મિત્ર રૂપેશ પંચાલની કવિતા થી પ્રેરિત હાઈકુ...

ભેટી પડવું,
આગનું હુન્નર છે,
લાશ ચેતજે.

યોગેન્દુ જોષી "યોગ" : ૦૨/૦૬/૨૦૧૨

FB Postings...

સૂર્ય લુંટે છે,
પાંદડાનું ઝાકળ,
મેઘ બાંધવા...

યોગેન્દુ જોષી : ૦૭/૦૨/૨૦૧૨

બારણા વાખ્યા,
બારી વાખી, તે છતાં;
પ્રવેશ્યું મોત...

યોગેન્દુ જોષી : ૦૭/૦૨/2012

વ્યક્તિ એકજ,
યોગ, યોજો, યોગેન્દુ;
ઓળખ? શબ્દો...

યોગેન્દુ જોષી : ૦૭/૦૨/૨૦૧૨

એક રોટલો
ને થોડી છાશ જોઈ,
માં : ભૂખ નથી!
પિતા : મેં ખાધું બેટા;
તું ખા, ને ખૂબ ભણ...

યોગેન્દુ જોષી : ૦૭/૦૨/૨૦૧૨
(પ્રયોગાત્મક વૈચારિક સંવાદ તાન્કા)

હાઇકુ...

જે લુંટી શકે,
પણ ચગાવી ના શકે,
એ બાળનું શું?

યોગેન્દુ જોષી : ૧૩/૦૧/૨૦૧૨

હાઇકુ...

ટમટમતા,
તારાની ટોળકીમાં,
શોધું પોતાના...

યોગેન્દુ જોષી : ૧૨/૦૧/૨૦૧૨

હાઇકુ...

આંસુનો મોલ,
પાણી કહે છે, પણ;
પાણીનો ભાવ???

યોગેન્દુ જોષી : ૧૦/૦૧/૨૦૧૨

હાઇકુ...

પતંગ જેમ,
ભાગ્ય સંધાતું હોત,
તો ઉડી જાત...

યોગેન્દુ જોષી : ૧૧/૦૧/૨૦૧૨